Pestarkvæði

Þar sem ýmsar pestir hefa herjað á landann í vetur þá er ekki laust við það að sumir hafi fengið nóg !!!!

neðanritað kom úr "bransanum"

 

Nú líður mér illa,

lasinn er ég,

margs konar kvilla

merki ber ég,

um allan skrokkinn

frá skalla að il

mér finnst ég alls staðar

finna til.

Þessi andskoti birtist í ýmsum myndum,

- fjölbreytnin er með ólíkindum:

í vindverkjum sterkum,

vondu kvefi,

ræmu í kverkum

rennsli úr nefi,

svo er þrálátur hósti

og þyngsli fyrir brjósti,

en beinverkir þjarma að baki og fótum,

og það brakar í öllum liðamótum,

þar grasserar sem sé giktarfjandi,

sem almennt er talinn ólæknandi.

Þá er sljóleiki í augum,

en slappelsi á taugum,

og svo þessi eilífa syfja,

eða sárindin milli rifja,

og óþægindi í einhverri mynd,

oftast báðu megin við þind.

Yfir höfðinu er þessi þráláti svimi,

en þreyta gagntekur alla limi.

Loks fylgir þessu lítill máttur,

óreglulegur andardráttur,

bólgnir eitlar og blásvört tunga,

bronkíttis í hægra lunga.

Svo safnast á skrokkinn skvapkennd fita

þótt ég skeri við nögl hvern matarbita,

og í sjö vikur hef ég,

segi og rita,

sofnað með köldu og vaknað með hita.

Samt hefði ég aldrei uppphátt kvartað,

ef lasleikinn væri ekki lagstur á hjartað,

þar hef ég nú stöðuga stingi,

sem stafa af of háum blóðþrýstingi.

Og lon og donhjá læknum er ég,

með litla vonfrá langflestum fer ég,

því að lítið er gagnið

að geislum, bökstrum og sprautum

við svona fjölbreyttri

vanlíðan og þrautum.

Það ber helst við

að mér batni á köflum

af brúnum skömmtum

og magnyl töflum.

Sem sagt: ég er á eilífum hlaupum

milli sérfróðra lækna og í lyfjakaupum.

Já, útlitið er ekki gott.

Ég þoli orðið hvorki þurrt né vott,

það er að segja fæði.

Og friðlaus af fjörefnaskorti

til fróunar mér ég orti

þetta kvalastillandi kvæði.

 

 

(Fékk þetta sent frá Öllu á Nýrækt eða "Nýræktarsystkinunum" . Það verða allir að vera búnir að jafna sig á öllum pestum þann 26. júlí þegar ballið okkar verður á Ketilási).  Kveðja Ippa

Athugasemdir

[bumba (IP-tala skráð) 13.3.2008 kl. 19:55]

Achhhhhhhhhhhh   ég ligg í flensu núna og ég skal svo sannarlega vera búinn að jafna mig í Júlí. Því skal ég lofa þér. Flott kvæði. Veiztu hver orti? Með beztu keðju.

[Ketilás, 13.3.2008 kl. 20:38]

Hef ekki hugmynd um hver orti, því miður. Já þú verður að vera hress á Ásnum í sumar. :-) Góðan bata!!!

[Hulda Margrét Traustadóttir, 14.3.2008 kl. 08:18]

Skondin texti. Gaman að þessu. Hef verið upptekin þessa viku en fer nú að snúa mér meira að því að hjálpa þér með síðuna. Þú ert dugleg í þessu !